VIDEO – Tashmë është zyrtare, Sali Berisha prezanton të shtunën Bardh Spahinë, kandidat i “Shtëpia e Lirisë” për Shkodrën

Ashtu siç e kishte njoftuar prej shumë ditësh ShkodraWeb, të shtunën ish- kryeministri Sali Berisha do to prezantojë zyrtarisht Bardh Spahinë si kandidat për kryetar i Bashkisë Shkodër. Sipas njoftimit të shpërndarë nga shtabi elektoral i kandidati të “Shtëpia e Lirisë”, takimi do të zhvillohet në sheshin para Bashkisë Shkodër.

Sipas të njëjtit njoftim, ai do të zhvillohet në orën 15.00 pikërisht para ndertesës, për administrimin e të cilës dhe Bashkisë Shkodër do të votohet me 6 mars 2022. Në njoftimin e shpërndarë nga mediat nga Komisioni i Përkohshëm i Rithemelimit, thuhet:


“Komisioni i Përkohshëm i Rithemelimit të PDSH-së, organizon bashkëbisedim me qytetarët e Shkodrës në lidhje me problematikat e keq-qeverisjes, ditën e shtunë, datë 12 Shkurt ora 15:00,tek sheshi para Bashkisë Shkodër.

Takimi zhvillohet me praninë e liderit historik të Partisë Demokratike, Prof. Dr. Sali Berisha dhe kandidatit të koalicionit opozitar ‘Shtëpia e Lirisë’ për Bashkinë e Shkodrës, Z. Bardh Spahija. Ftojmë qytetaret dhe qytetarët, të rinjtë dhe të rejat të marrin pjesë në këtë takim.

Aktiviteti do të mbahet brënda kuadrit të masave anti-Covid 19.”, thuhet në këtë njoftim.

Me prezantimin e Bardh Spahisë, përfundon procesi i shpalljes zyrtare të emrave në garë. Më herët, PD- ja zyrtare ka prezantuar përmes nënkryetarit Enkelejd Alibeaj në selinë blu të Shkodrës kandidatin e saj Xhemal Bushati dhe disa ditë më vonë, në kinema “Millennium” sekretari i përgjithshëm Damian Gjiknuri prezantoi kandidaten e PS- së Majlinda Angoni.

Berisha dhe Komisioni i Përkohshëm i Rithemelimit kanë menduar që kandidatin Bardh Spahia, ta prezantojnë para Bashkisë së Shkodrës, në sheh të hapur, me një simbolikë të fortë dhe të kuptueshme.