Në prag të ndeshjes Shqipëri–Serbi, protagonisti i sfidës historike në Beograd, Bekim Balaj, ndau emocionet dhe përjetimet e asaj mbrëmjeje të paharrueshme. Ai theksoi se përballja e radhës ka një tjetër peshë dhe rëndësi, ndërsa u bëri thirrje lojtarëve të tregohen të përmbajtur dhe të fokusuar për të arritur objektivin madhor: kualifikimin në Botëror.
Sulmuesi i njohur ishte pjesë e një takimi motivues me të rinjtë në Shkodër, në kuadër të edicionit “Ta tham n’Shkodër”, ku përcolli një mesazh inkurajues dhe frymëzues për brezin e ri.
Loreta Çermeli u shpreh se këto takime me personazhe frymëzues dhe të suksesshëm janë qëllimi kryesor i nismës së përbashkët të Bashkisë Shkodër, Qendrës Rinore Atelie dhe Këshillit Rinor Vendor. Ato synojnë të motivojnë të rinjtë dhe të krijojnë ura komunikimi me figura që kanë bërë ndryshimin.
Takime si ky me Bekim Balajn tregojnë se rrugët drejt suksesit mund te nisin nga qytete si Shkodra dhe nga ëndrrat e thjeshta të të rinjve.
