Sporti i mundjes është përfshirë në një skandal të vërtetë gjatë ceremonisë së dorëzimit të medaljeve në Kampionatin Europian të zhvilluar në Bratislavë të Sllovakisë.
Presidenti i Federatës Ruse të Mundjes dhe Zv/Presidenti i Federatës Botërore të Mundjes, Mikhail Mamiashvili, në momentin e dorëzimit të medaljes së Artë për Chermen Valiev, si Kampion Europe për Shqipërinë, ka bërë një gjest skandaloz, duke ushtruar forcë teksa i vendoste në qafë medaljen dhe më pas duke e shtyrë me duar. Gjatë këtij momenti është dëgjuar edhe fjala ‘tradhëtar’ për Chermen Valiev, që ka zgjedhur të garojë për Shqipërinë.
Chermen Valiev kthehet në Shqipëri si Kampion i Europës në mundje. Pas medaljes së parë historike për Shqipërinë, në Lojërat Olimpike Paris 2024, Cherman Valiev bëhet edhe Kampioni i Europës në kampionatin e zhvilluar në Bratislavë, të Sllovakisë. Mundësi i Shqipërisë bëri një garim fantastik në këtë europian, duke treguar talentin e tij të jashtëzakonshëm dhe një besimin e plotë për Medaljen e Artë.
Me medalje është kthyer nga ky europian edhe Zelimkhan Abakarov, që siguroi medaljen e Bronztë në peshën 61kg, stil i lirë. Dy mundësit kampionë, që shoqëroheshin në këtë europian nga Presidenti i Federatës së Mundjes, Sahit Prizreni, janë pritur me nderime në Aeroportin Nënë Tereza nga Presidenti i KOKSH, z. Fidel Ylli dhe shumë dashamirës të mundjes.
Presidenti Fidel Ylli ka vlerësuar 2 mundësit për arritjet e shkëlqyera në këtë europian dhe ka përgëzuar Presidentin Prizreni, për sukseset e njëpasnjëshme nga Federata e Mundjes. /Publikuar në faqen në Facebook të KOKSH/
