Bashkia Shkodër zhvilloi ceremoninë e shpërndarjes së “Kartës së Studentit Shkodër”, një nismë që synon të krijojë më shumë mundësi, mbështetje dhe perspektivë për studentët që studiojnë dhe jetojnë në qytet. Në këtë fazë të parë u shpërndanë 520 karta për studentët e Universitetit të Shkodrës “Luigj Gurakuqi”.
Në fjalën e tij, Kryetari i Bashkisë Shkodër, Benet Beci, theksoi se kjo kartë nuk është thjesht një dokument identifikimi, por një platformë moderne digjitale që lidh studentët me universitetin, qytetin, bizneset dhe shërbimet e përditshme. Ndërkohë, Rektori i Universitetit të Shkodrës “Luigj Gurakuqi”, Tonin Gjuraj, u shpreh se ky është një premtim i mbajtur për studentët dhe universitetin.
Përmes kësaj platforme, studentët do të kenë kartën e tyre digjitale në telefon, QR personal për verifikim, si dhe akses në zbritje dhe përfitime në transport, shërbime shëndetësore, farmaci, bare, restorante, librari, kurse profesionale, teknologji, aktivitete kulturore e sportive dhe shumë shërbime të tjera lokale.
Vetë studentët u shprehën se kjo është një nismë e shumëpritur, e cila do të ndikojë drejtpërdrejt në jetën e tyre të përditshme dhe në lehtësimin e kostove studentore.
Kjo nismë synon jo vetëm të lehtësojë kostot e jetesës studentore, por edhe të forcojë lidhjen e të rinjve me jetën ekonomike, sociale dhe kulturore të qytetit.
“Karta e Studentit Shkodër” është një mesazh i qartë se Bashkia Shkodër beson tek të rinjtë dhe synon ta bëjë qytetin më modern, inovativ dhe më të orientuar drejt rinisë.
