VIDEO – ShkodraWeb siguron videon e shpërthimit të kontrolluar të pakos së dyshimtë, makina në pronësi të drejtoreshës…

Zbulohen detaje të reja nga ngjarja që alarmoi Shkodrën, ndërsa ShkodraWeb ka siguruar momentin kur forcat xheniere të RENEA- s kanë kryer shpërthim të kontrolluar të paskos së dyshimtë në gomën e parë të një mjeti të parkuar.

Automjeti tip ‘Range Rover’ me ngjyrë të bardhë ku ishte vendosur lënda shpërthyese e llojit tritol, është në pronësi të drejtoreshës së Operatorit të Kujdesit Shëndetësor, Suida Kuka.


Makina ka qenë e parkuar pranë godinës së Shëndetit Publik të Shkodrës. Tritoli ishte vendosur poshtë gomës së parë të automjetit.

Alarmin për vënien e lëndës plasëse në makinën luksoze ‘Range Rover’ të Suida Kukës, drejtore e Shëndetit Publik në Shkodër, është dhënë nga rojet e sigurisë.

Kanë qenë këta të fundit që kanë vënë re një person me motor që ka vënë diçka të dyshimtë në gomën e parë të makines. Personi që ka vënë lëndën plasëse është regjistruar nga kamerat e sigurisë dhe pritet që të bëhet identifikimi i tij dhe zbulimi i rrethanave të të ngjarjes.

Kanë qenë forcat xheniere të cilat kanë mbërritur në vendin e ngjarjes dhe kanë bërë shpërthimin e kontrolluar të lëndës eksplozive Fatmirësisht lënda shpërthyese është pikasur në kohë, duke shmangur kështu një ngjarje kriminale me pasoja të rënda.

Suida KUKA

Shkodër/Informacion shtesë

Në vijim të informacionit paraprak për një pako të dyshimtë që u konstatua në lagjen “Vojo Kushi”, Shkodër, në afërsi të një mjeti “Range Rover”, në pronësi të shtetases S. K., banuese në fshatin Demiraj, Malësi e Madhe, me detyrë Drejtoreshë e Drejtorisë së Shëndetit Publik Shkodër, ju informojmë se:

Në vendin ku u konstatua pakoja e mbyllur erdhi njësia antieksploziv e RENEA-s, e cila bëri shpërthim të kontrolluar të pakos, brenda së cilës rezultoi se kishte lëndë eksplozive.

Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon veprimet për zbardhjen e rrethanave të ngjarjes, identifikimin dhe kapjen e autorit.