VIDEO – Rikonstruktohet konvikti i universitetit por vetëm 30 kerkesa ka për akomodim nga studentët…

Shkruan në Facebook Benet Beci, kryetar i Bashkisë së Shkodrës: Në prag të nisjes së vitit të ri akademik, inspektova sot Ndërmarrjen e Trajtimit të Studentëve.

Situata në godinat e konvikteve për studentët është krejt e ndryshme. Nga njëra anë kushtet janë përmirësuar ndjeshëm falë investimit të viteve të fundit nga Fondi Shqiptar i Zhvillimit, ndërkohë që ndërtesat e vjetra janë dëshmia e harresës që i është bërë studentëve dhe kushteve të jetesës për ta në shumë vite me rradhë.

Këto godina janë gati të mirëpresin deri në 500 studentë që janë pjesë e Universitetit të Shkodrës, por fakti që kërkesat për t’u akomoduar aty janë rreth 30, pra më pak se 1/10 e kapacitetit, është vërtet shqetësues.

Universiteti i Shkodrës po përballet vitet e fundit me një ulje shumë të madhe të interesit të studentëve për të ndjekur studimet në fakultetet e tij. Kjo duhet të na shqetësojë të gjithëve.

Teksa Bashkia Shkodër do të bëjë të pamundurën për të sistemuar të gjitha godinat e konvikteve me kushte bashkëkohore, ajo për të cilën duhet të punojmë bashkë të gjithë, është ndërhyrja emergjente për ta kthyer Shkodrën në një qytet studentor, që mirëpret studentë nga gjithë rajoni e që iu siguron atyre kushtet jo vetëm për tu arsimuar, por edhe për të jetuar e kontribuar me dinjitet në zhvillimin e qytetit tonë.