Rikonstruksioni i plotë i shkollës “Ndre Mjeda” në Shkodër po ecën me ritme të shpejta, falë financimit të Bashkisë Shkodër. Inxhinieri Adrian Kalamishi bëri me dije se, ndonëse përfundimi i punimeve është parashikuar për muajin janar të vitit të ardhshëm, dy brigada speciale po punojnë me kapacitet të plotë për të përshpejtuar procesin, me synimin që shkolla të jetë gati që në nisje të vitit të ri shkollor.
Punimeve i është shtuar edhe ndërtimi i një godine të re, e cila do të përfshijë kopsht dhe disa klasa shtesë. Inxhinieri Kalamishi theksoi se të gjitha ndërhyrjet po realizohen sipas standardeve më të mira dhe do të garantojnë kushte bashkëkohore si për nxënësit, ashtu edhe për stafin pedagogjik.
Ky investim është pjesë e një ndërhyrjeje më të gjerë që Bashkia Shkodër po realizon në disa shkolla të qytetit, me qëllim rritjen e cilësisë së infrastrukturës arsimore dhe ofrimin e kushteve më të mira për nxënësit dhe stafet arsimore.
