“Partia Socialdemokrate do të jetë në mbështetje të Partisë Socialiste”. Kështu u shpreh anëtarja e Këshillit Bashkiak Rezarta Pode, pas përfundimit të mbledhjes së radhës të parlamentit të vogël të Shkodrës.
Këshilli Bashkiak i Shkodrës ka gjetur dakortësinë dhe me shumicë votash kanë kaluar rendin e ditës, ku PSD-ja i dha fund bojkotit dhe i dha dritën jeshile bashkëpunimit, mes të cilave më e rëndësishmja ishte dhënia e së drejtës dhe caktimi i përgjegjësisë së menaxhimit, administrimit dhe mirëmbajtjes së plazheve publike nga shoqëria aksionere në pronësi të Bashkisë Shkodër.
“PSD ka qenë dhe do të jetë gjithmonë në mbështetje të PS. Edhe pse në 11 maj garuam të vetëm, vazhdimësia do të jetë e përbashkët. Çdo projekt vendim i mirë për Shkodrën do të jetë në mbështetje në PS. Në zgjedhjet vendore të 2027 do të jemi në mbështetje të PS”, tha anëtarja e PSD, Rezarta Pode.
Më pas këshilltarët kaluan një shtesë në buxhetin e vitit 2025, planin për parandalimin dhe shuarjen e zjarreve në fondin pyjor në Bashkinë Shkodër.
Janë dashur diçka më shumë se 2 javë që PSD- ja të “kuptojë gabimin” në zgjedhjet e 11 maj 2025. Qendrimi i saj, në nivel lokal por edhe qendror, ishte i pashpjegueshëm, përsa kohë kur jo zyrtarisht, PSD- ja ishte në bashkëqeverisje në nivel rajonal e lokal, të paktën në Shkodër, me PS-në. Ndërkohë, kjo qasje jep edhe një argument më shumë për të kuptuar se morali nuk ka asnjë vlerë në politikë, teksa “armiqtë” kthehen në “miq” sa hap e mbyll sytë.
Të gjitha akuzat që iu bënë PS- së, Ramës apo edhe Becit nga Tom Doshi apo nivele të tjera politike, paskan qenë thjesht dhe vetëm “limonata elektorale”. Kështu të paktën i ka konsideruar para disa viteve, një politikan shumë i fortë i këtij vendi. Lëvizja më e fundit mund të shihet si servilizëm lokal ndaj PS- së, e cila në nivel të qeverisjes qendrore, pas rezultatit të 11 maj 2025, nuk ka asnjë nevojë për PSD- në apo ndonjë parti tjetër.
