Policia e Shkodrës ka arritur të identifikojë autorin e dyshuar që la të plagosur 28-vjeçarin Edis Reçajn në lagjen “Perash” të qytetit, bëjnë me dije burime pranë uniformave blu. Raportohet se policia tashmë është në kërkim të personit, identitetin e të cilit nuk e bën të ditur. Mësohet se autori i dyshuar ka qënë në mjet me Reçajn, e më pas e ka qëlluar me armë.
Po ashtu, bëhet me dije se autori i dyshuar është një personazh jo i panjohur për forcat e rendit, të cilat kanë shkuar në banesën e tij mbrëmjen e kaluar por nuk e kanë gjetur.
Reçaj u plagos mbrëmjen e kaluar, rreth orës 22.00 në lagjen “Perash” të Shkodrës. I riu mori një plumb në gjurin e këmbës së djathtë. Policia e Shkodrës u njoftua përmes një telefonate për të shtëna me armë, e ndërkohë që efektivët kërkonin në zonë, 28-vjeçari Reçaj kishte shkuar vetë në spital. 28- vjeçari është nën kujdesin e mjekëve, jashtë rrezikut për jetën pasi i është nështruar ndërhyrjes për shkak të plagës së marrë.
Çfarë deklaroi në polici 28 vjeçari
I riu i cili mori një plumb në këmbë dhe ndodhet jashtë rrezikut për jetën në dëshminë e tij për policinë vendore të Shkodrës ka deklaruar se nuk e ka idenë se kush është autori i kësaj ngjarje.
Ai ka dëshmuar vetëm se “një person me kapuç të zi në kokë më ka ardhur nga mbrapa dhe më ka plagosur në këmbë dhe është larguar me shpejtësi. Nuk e kam idenë se kush është autori që më plagosi. Nuk kam patur konflikte apo probleme me ndonjë person ndaj edhe nuk e di arsyen e kësaj ngjarje”.
Kështu mësohet të ketë deklaruar para hetuesve nga spitalit i plagosuri. Pavarësisht kësaj dëshmie policia e Shkodrës ka dyshime se Edis Reçaj është në dijeni të autorit të plagosjes por nuk ka dhënë asnjë emër për faktin se autori mund të jetë një i njohur i 28 vjeçarit.
