Pas një transformimi të plotë dhe të shumëpritur, kopshti “Bardhaj” tashmë është rikthyer në funksion, duke hapur dyert me kushte krejtësisht të reja për fëmijët dhe stafin edukues. Investimi i realizuar nga Bashkia Shkodër përmes Drejtorisë së Përgjithshme të Menaxhimit të Objekteve Publike i ka dhënë fund një periudhe të gjatë degradimi, duke e kthyer këtë institucion në një hapësirë dinjitoze, të sigurt dhe bashkëkohore për edukimin në moshat e hershme.
Rikonstruksioni ka përfshirë të gjitha ambientet e godinës, duke sjellë përmirësime thelbësore në infrastrukturë dhe funksionalitet. Për herë të parë, tualetet janë integruar brenda godinës, duke rritur ndjeshëm sigurinë dhe komoditetin për fëmijët. Po ashtu, janë krijuar kushte më të mira për zhvillimin e aktiviteteve mësimore dhe edukative. Rikonstruksioni i kopshtit “Bardhaj” është pjesë e një serie investimesh që Bashkia Shkodër po realizon në institucionet arsimore, me fokus të qartë: krijimin e një infrastrukture moderne, të sigurt dhe në shërbim të së ardhmes së fëmijëve.
