Rruga Ura e Mesit- Drisht në Njësinë Administrative Postribë, i është nënshtruar rikonstruksionit. Sinjalistika horizontale dhe ajo vertikale, ka shënuar fundin e punimeve për lotin e parë.
Projekti i Bashkisë së Shkodrës, me një vlerë 11.4 milion lekë, parashikonte 4240 metër katror asfalt në një gjatësi lineare të rrugës 1100 metër, punime për kanalizimet e ujrave të bardha- KUB me një volum 183 metër kub, tombino, guardrail anësore 45 metër linear, sinjalistikë vertikale e horizontale.
Pas lotit të parë, pritet që puna të vazhdojë meqenëse Bashkia e Shkodrës ka siguruar përmes projektit të saj, mbështetjen me fonde nga FSHZH-ja për përfundimin e plotë të saj. Ky aks, përveç lehtësive që sjell në qarkullimin e njerëzve, mallrave e mjeteve, hap mundësi të reja edhe për turizmin, duke patur si atraksion kryesor kalanë e Drishtit por edhe mjaft vlera të tjera që pritet të zbulohen nga ata që do ta vizitojnë.