Prej 11 muajsh, Ndërmarrja e Shërbimeve dhe Punëve Publike në Shkodër ka nisur një proces të rëndësishëm për heqjen e kabllove nga fasadat e pallateve – një problem i trashëguar ndër vite që dëmtonte estetikën e qytetit dhe paraqiste rrezik për sigurinë publike.
Ogert Lesha, specialist elektrik pranë kësaj drejtorie, tha se tashmë ky proces është kthyer në punë të përditshme dhe është mirëpritur nga komuniteti, pasi ka sjellë përmirësim të ndjeshëm të pamjes vizuale dhe ka reduktuar rreziqet për banorët.
Përgjegjësi Lesha theksoi se puna është përqendruar në ato blloqe pallatesh ku është përfunduar veshja me kapotë dhe fasadat, ndërsa është realizuar një bashkëpunim korrekt me kompanitë e internetit dhe telefonisë për të punuar në mënyrë të sinkronizuar, në mënyrë që qytetarët përfitues të mos përballen me avari apo ndërprerje shërbimi.
Ky proces i nisur nga Bashkia Shkodër është pjesë e vizionit për një qytet më estetik, më të organizuar dhe më të sigurt për qytetarët. Ndërhyrjet do të vijojnë në të gjitha zonat urbane, duke garantuar standarde bashkëkohore dhe bashkëpunim të ngushtë me komunitetin dhe operatorët e shërbimeve.
