Shkodra ishte një tjetër stacion i filmit “Pasaporta” të regjisorit Eduart Grishaj. Premiera e tij u shoqërua nga pjesëmarrja e aktorëve protagonistë dhe tingujt e muzikës në hollin e Kinema “Republika”.
Filmi trajton temën e emigracionit ilegal dhe sfidat që përballojnë shqiptarët në kërkim të një jete më të mirë jashtë vendit. Ai është bazuar në ngjarje të vërteta dhe ofron një pasqyrë të thellë mbi identitetin dhe përvojat e emigrantëve shqiptarë.
Rolin kryesor në film e luan aktori Indri Shiroka që vijon në gjurmët e gjyshit të tij, Bep Shiroka. Ai portretizon Edonin, një të ri shqiptar që përpiqet të emigrojë nga Shqipëria. Ashtu si personazhi i tij, edhe Indri ka emigruar nga Shqipëria në moshë të re, duke sjellë një autenticitet të veçantë në interpretimin e tij.
Filmi ka patur një jehonë të madhe në media dhe është pritur me interes nga publiku shqiptar. Përshëndetja e kastit të aktorëve me në krye regjisorin parapriu shfaqjen e filmit për shikuesit shkodranë.
