Dënimi me humbjen e ndeshjes në tavolinë ka bërë që klubi i Tomorit të tërhiqet nga kampionati në mesin e sezonit. Në një konferencë për shtyp ata hedhin akuza të rënda si ndaj zyrtarëve të takimit me Apoloninë ashtu ndaj vetë FSHF-së. Klubi i Tomorit që militon në Kategorinë e Parë ka marrë vendimin drastik për tërheqjen nga kampionati.
Një vendim që vjen pas dënimit nga Komisioni i Disiplinës ku klubi berates u dënua me humbjen e ndeshjes 3-0 në tavolinë në favor të Apolonisë, pasi sipas Disiplinës FK Tomori ka dështuar në në përmbushjen e përgjegjësive për organizimin e ndeshjes duke mos zbatuar rregullat e sigurisë dhe duke mos garantuar sigurinë e zyrtarëve të ndeshjes dhe lojtarëve kundërshtarë.
Njoftimin për tërhqjen nga gara e bëri zyrtari i klubit Alban Pambuku: “Me keqardhje iu njoftojmë se FK Tomori nuk do të udhëtojë në ndeshjen e ardhshme kundër Bylis. Ne nuk bëhemi pjesë e kësaj maskarade ku vihet në diskutim integriteti dhe emri i Tomorrit.”
Pas këtij vendimi klubi i Tomorit ka shpërthyer në akuza ndaj zyrtarëve të ndeshjes si dhe vetë FSHF-së. “Kjo është një maskaradë e kurdisur nga disa pseudozyrtar dhe servilë me logon e FSHF-së, si delegati i ndeshjes Petrit Haxhia, gjyqtari Elidon Halo dhe vetë institucioni i futbollit.”
Klubi i Tomorit mohon kategorikisht që gjatë ndeshjes me Apoloninë të ketë patur dhunë në stadium apo të ketë dështuar në përmbushjen e përgjegjësive për organizimin e ndeshjes. Sipas tyre çdo gjë është e vërtetueshme pasi në stadium ka kemarë sigurie.
Ndërkohë, në faqen zyrtare në Facebook të FK Tomori kanë nisur publikimin e mesazheve të shkëmbyer me arbitrat. Në shënimin që shoqëron postimin shkruhet: ” Futboll Klub Tomori | FAKTTT. Një nga faktet që do depozitohet në FSHF, Elidon Halo, të kujtohet kjo biseda?”.
