Belinda Balluku nuk iu dorëzua SPAK! Me 82 votat pro të socialistëve dhe 47 votat kundër të opozitës, Kuvendi rrëzoi kërkesën e Prokurorisë së Posaçme për arrestimin e ish-zv.kryeministres, e pandehur për shkelje të barazisë në tenderë.
Ashtu siç e kishin paralajmëruar, Partia Socialiste i qëndroi argumenteve të saj në mbrojtje të Ballukut, duke thënë se ky vendim në asnjë rast nuk pengon hetimin e SPAK. Ulsi Manja i cili lexoi raportin e mazhorancës, theksoi se Balluku ka respektuar masat e sigurisë që janë vendosur ndaj saj dhe procesin penal, nuk ka asnjë fakt që ajo mund të prishë provat apo të arratiset dhe fakti që nuk është më në detyrë garanton se nuk mund ta përsëritë krimin.
