Vllaznia synon vetëm 3 pikët përballë Bylis në stadiumin “Loro Boriçi”. Trajneri Thomas Brdaric ka qenë i qartë dhe ka deklaruar pa mëdyshje objektivin e ekipit që drejton.
Thomas Brdaric, Trajner i Vllaznisë: Jemi akoma në procese. Jemi akoma në përgatitje. Kemi një javë shumë të shkurtër dhe na ka mbetur edhe një stërvitje pa përfunduar sot. Duhet të punojmë me ritmin. Të mbajmë një atmosferë të mirë në ekip. Po ashtu edhe shpirtin e garës, që të fitojmë nesër ndeshjen. Çdo ndeshje është e ndryshme, nesër kemi një mundësi të mirë për të arritur tre pikëshin. Duhet të kemi shtysën e rezultateve të mira për të na çuar tek objektivi i nesërm, që është vetëm fitorja.
Brdaric ka konfirmuar mungesën e Qatos dhe Spahisë, teksa ka shtuar se Mensah ka probleme muskulore por shpreson të jetë i gatshëm për të dielën, pasi na duhet kontingjenti i plotë, ka shtuar ai. Timonieri i Vllaznisë, ka komentuar edhe ndeshjen e fundit për kupë me Elbasanin, e cila ngjalli polemika lidhur me kushtet në dhomat e zhveshjes.
Thomas Brdaric, Trajner i Vllaznisë: Ne patëm një rezultat të mirë atje. Nuk jemi mësuar të fillojmë ndeshjen në ato kushte. Dhoma ishte pak e ftohtë por thanë që kishin disa probleme teknike në stadium, por arritëm të marrim një rezultat mjaft të mirë.
Vllaznia luan me Bylis pasditen e të dielës në orën 17, duke synuar një tjetër fitore, e cila e mban në 4 vendet e para por edhe për të synuar parakalimin e Egnatias në krye të Abissnet Superiore.
