90 minutat dhe 10 minuta shtesa (4 në të parën dhe 6 në të dytën) nuk mjaftojnë për të njohur fituesin e “Euro 2020”. Italia dhe Anglia kanë shënuar nga një gol, duke shtyrë edhe 30 minuta, ndoshta edhe me penallti, sfidën historike ku Italia kërkon trofeun e dytë europian ndërsa Anglia e kërkon trofeun e parë në Europë, pasi atë e braktisi me “Brexit”.
117 sekonda i mjaftojnë Anglisë të gjejë golin në finalen e madhe të “Euro 2020”. Një goditje me të majtën e Luk Shaw dhe topi pasi ledhaton shtyllën vertikale, pushon në rrjetë. Gol, që shënon edhe një rekord, për golin më të shpejtë në finalen e një Europiani.
Pas golit që mesa duket i nxorri disi nga shinat, italianët vonuan të rifuten në lojë, e cila u zotërua për gati 25 minuta nga anglezët. 20 minutat e fundit dhe 4 të shtesës, panë një Itali më agresive, e cila për hir të realitetit zotëroi mesfushën dhe vizitoi më shpesh zonën angleze por pa rrezikuar shumë portën.
Në pjesën e dytë, loja u bë edhe më e bukur ku Italia “futi” edhe një marsh tjetër në kërkim të golit. Ai ka ardhur në minutën e 67- të me Bonucci. Pas një korneje, topi ka mbërritur tek Verati, i cili godet me kokë por pret portieri anglez. Bonucci sheh që topi të jetë i arritshëm duke e shtyrë përtej vijës fatale.
Kjo është kronika, ndërsa janë edhe 30 minuta për tu luajtur e nëse nuk ka fitues, do të duhet “ruleta ruse” e penalltive për të njohur kampionin e Europës në futboll.
