Kryeministri Edi Rama e ka nisur herët punën këtë ditë të parë të javës, ndërsa përshëndet me një video nga zyra e tij në selinë e Partisë Socialiste, ku është dhe kryetari i saj.
Përmes një videomesazhi kreu i qeverisë shprehet optimist se PS-ja do t’i fitojë zgjedhjet lokale. Mes të tjerash ai iu uron shqiptarëve që të bjerë sa më shumë shi, për të parandaluar kështu inflacionin për shkak të luftës së Putinit, duke kujtuar kështu rrezikun për rritjen e çmimit të energjisë elektrike.
“Mirëmëngjesi, një ditë e re, një jave e re, në zyrën e Partisë Socialiste, për të nisur edhe një rrugë të re, drejt një fitore të re, atë të zgjedhjeve vendore. Në dialogun me komunitetin në të gjithë Shqipërinë, për qeverisjen vendore dhe për të sfidat e përbashkëta.
Paçi një javë të mbarë, me sa më shumë shi mundësisht. Shiu nuk duhet të na harrojë, pasi na duhet për të luftuar me inflacionin e luftës së Putinit, që nuk e kemi sjellë ne, por duhet të bëjmë çmos ta lehtësojmë sa më shumë për të gjithë ju.”, pohon Rama, ndërsa në video shfaqen edhe dy breshka që qëndrojnë në zyrën e tij.
