Aplikimet e para për Kartën e Studentit kanë nisur zyrtarisht në Bashkia Shkodër, ku është hapur edhe zyra e posaçme për aplikim fizik pranë sportelit të dedikuar.
Ky shërbim i ri u jep mundësi studentëve të aplikojnë jo vetëm përmes sistemit online, por edhe drejtpërdrejt në ambientet e Bashkisë, duke lehtësuar aksesin dhe përfshirjen e të gjithë të rinjve në këtë proces.
Hapja e zyrës shënon nisjen konkrete të aplikimeve për mbi 3700 studentë që studiojnë në qytetin e Shkodrës. Përmes Kartës së Studentit, ata do të përfitojnë më shumë se 100 lehtësira në të gjithë vendin, me zbritje deri në 70% në biznese partnere, si dhe shërbime falas dhe oferta ekskluzive.
Ky konsiderohet një hap i rëndësishëm në mbështetje të studentëve dhe një investim i drejtpërdrejtë në të ardhmen e qytetit. Aplikimet vijojnë si pranë zyrës së dedikuar në Bashki, ashtu edhe përmes platformës online.
