“Nesër për ne do të jetë si finale”. Kështu shprehet kapiteni i Vllaznisë Erdenis Gurishta para ndeshje me Kastriotin në Supërligë. Ai vlerëson maksimalisht ekipin e Kastriotin, por e thotë qartë se “na duhen medoemos 3 pikët për të arritur objektivin”. Madje ai shkon edhe përtej kur shprehet se “meqë matematika na mban në lojë, pse të mos shpresojmë titullin”.
Duke folur për sezonin, ai e quan të suksesshëm për Vllazninë. “Synojmë të jemi në tre vendet e para, jemi në finalen e Kupës, të arrijmë në Kupat e Europës”. Pa dhënë emra, Gurishta flet për ekipe të tjera, që sipas tij, e kanë patur autostradë në këtë sezon. “Ne nuk kemi patur asnjë aleat, të gjitha ekipet që kanë luajtur me ne, kanë luftuar për jetë a vdekje”.
“Kështu do të jetë për ne nesër me Kastriotin”, ka shtuar kapiteni kuqeblu. Ai ka kujtuar ndeshjen e luajtur në “Loro Boriçi”, ku sipas tij miqtë nuk ishin “fair” në lojën e tyre. “Megjithatë, ua morëm hakun në Kamzë, me atë gol në minutat e fundit”, ka shtuar Gurishta. Ndeshja e nesërme është jetike për objektivat e Vllaznisë por edhe për fatin e Kastriotit në Superligë. Pa dyshim, do të jetë një ndeshje e fortë dhe e luftuar.