Ndoc Shaben, është një emër jo vetëm i mirënjohur por edhe me kontribute të rralla jo vetëm për zonën e Vau Dejësit por edhe për qarkun e Shkodrës e më gjërë.
Përveç mësimdhënies dhe kontributit për komunitetin në pozicione të ndryshme edhe publike, Ndoc Shaben ka krijuar vlera të jashtëyzakonshme duke koleksionuar relikte që sot janë pjesë e atij që quhet me modesti nga ana e tij Muzeu Etnografik “Zadrima”.
Në vlerësim të këtij kontributi shumë të veçantë, sot ai është vizituar nga kryebashkiaku i Vau Dejësit, Kristian Shkreli, i cili i ka dorëzuar edhe një certifikatë “Mirënjohje”.
“Sot, së bashku me stafin e Bashkisë, vizituam profesor Ndoc Shaben, një figurë e respektuar e arsimit dhe kulturës në zonën tonë. Gjatë gjithë jetës së tij, ai ka dhënë një kontribut të çmuar në edukimin e brezave dhe në ruajtjen e vlerave historike e kulturore të krahinës. Me pasion dhe përkushtim të rrallë, profesori ka ndërtuar një muze unik, të cilin e ka kthyer në pjesë të jetës së tij të përditshme, si dëshmi e dashurisë për historinë, traditën dhe identitetin tonë. Në shenjë mirënjohjeje, i dorëzuam certifikatë vlerësimi, duke e përgëzuar për këtë trashëgimi të vyer që ai po ua lë brezave të ardhshëm. Mirënjohës!”, shkruan në rrjetet sociale kryebashkiaku i Vau Dejësit, Kristian Shkreli.
