Kryeministri Edi Rama foli këtë të martë për protestat masive në Tiranë kundër rritjes së çmimeve. Rama u shpreh se as vetë Kremlini nuk do i organizonte dot më bukur, duke shtuar se kjo është të bësh punën e armikut kundër qeverisë së vendit tënd.
Rama foli edhe për koncertin e Malumës në Tiranë ku tha se ka marrë shumë komente nga qytetarët por me batutë shtoi se nuk e dinte nëse ai ishte burrë apo grua. Rama theksoi se ai nuk ka ardhur në Tiranë me pagesa nga fondet publike.
“Ishte njëri shumë interesant. Më thoshte mua unë me rrogë 200 mijë lekë. Rroga më shkon e gjitha për qiranë. Dhe i dilte edhe 450 mijë lekësh për shpenzime të tjera. Dhe 300 mijë për ushqimet dhe nuk më ngelet gjë mua në fund. Unë i thashë rrogë 200 mijë lekë nuk ka. Por si ia del ti.
Duhet të kemi parasysh që kjo rritje çmimesh e befasishme. Fakti që ka ndodhur kudo domethënë që nuk ka lidhje me qëndrimin e qeverisë ndaj luftës. Që është komplekt në front me sanskione dhe të gjitha. Edhe vendet që nuk kanë vënë sanskione kanë të njëjtin problem. Edhe Serbia ka të njëjtin problem me furnizimin. Është një nga eksportuesit kryesor të drithërave në Europë. Madje ka marrëdhënie me Rusinë.
Është një krizë që ka goditur zinxhirët ekonomikë. Dhe nuk funksionon kështu. Nuk jemi më në atë ekonomi. Nuk është më një Shqipëri e izoluar që sheh vetëm si të nxjerrë bukën në vend. Të thuash që ky është rasti të bëjmë rrëmujë, kjo është turp. Edhe unë këtë turp do e përsëris sa herë do flas për këtë punë. Të protestosh sot për rritjen e çmimeve që e ka shkaktuar një luftë.
Këto lloj protestash që më mirë dhe më bukur nuk i organizonte dot as vetë Kremlini. Është të bësh punën e dikujt krejt tjetër, në këtë rast e një armiku të demokracisë për të luftuar me qeverinë tënde në këtë Shqipërinë e vogël.
M’u qepën për Malumën mua. Deri dje nuk e dija kush ishte Maluma. Thashë do jetë ndonjë epitet që ia ka ngjitur ndonjë ministri. Burrë a grua është?! Burrë, këngëtar. Koncertin e Malumës. Nëse mendohet që e kemi bërë ne, nuk e kemi bërë ne. Tregoje ti se ndoshta ti ke bërë ndonjë gjë. Që të mos mbaj më unë përgjegjësi për ty. Mua më vunë ambazhurin. Atë e kanë sjellë italianët sepse e ndërtuan vetë godinën dhe e kanë sjellë që atëherë. Ai ka qenë mbi kokën e kryeministrave të tjerë. Tani doli që është floriri dhe e kam blerë unë për ta bërë tavanin si në Dubai”, u shpreh ai.
