Është përcjellë me nderime të merituara në “banesën e fundit” legjenda e portës shkodrane por edhe shqiptare, Paulin Ndoja. Kanë qenë qindra sportistë, ish- sportistë, autoritete të larta të qeverisjes vendore dhe të sportit, që kanë bërë homazhe dhe kanë vendosur kurora me lule në hollin e stadiumit “Loro Boriçi”.
Në homazhet e zhvilluara në stadiumin “Loro Boriçi” ishte i pranishëm edhe Presidenti i FSHF, Armand Duka, dhe anëtari i Komitetit Ekzekutiv, Bardhyl Jera.
Presidenti Duka: “Kemi humbur një nga futbollistët me më shumë kontribute në futbollin shkodran dhe atë shqiptar, Paulin Ndojën. Kemi humbur një mik të mirë, një shok dhe familjar të mirë, një njeri shumë i respektuar në ambientet futbollistike në të gjithë Shqipërinë. Ka qenë një njeri paqësor, një njeri që ka përcjellë vetëm mesazhe pozitive gjatë gjithë jetës së tij”.
