Ka nisur seanca plenare në Kuvend, e para që nga fushata elektorale dhe zgjedhjet e 11 majit. Kryetarja e Kuvendit Elisa Spiropali njoftoi se në mbledhjen e Konferencës së Kryetarëve nuk u ra dakord për programin dhe kalendarin e punimeve, duke njoftuar se në lidhej me këtë do të diskutohet në seancë.
Menjëherë ka kërkuar dhe ka marrë fjalën kryetari i PD- së, Sali Berisha.
Sali Berisha: Kjo seancë mblidhet pas farsës elektorale më të turpshme pas rënies së perdes së hekurt në periudhën pas komuniste në Europë. Partia e krimit me në krye Ramën zhvilloi farsën zgjedhore më kriminale që ka njohur ndonjëherë historia e vendit.
Kjo seancë mblidhet pasi në shkelje të të gjitha ligjeve kombëtare dhe ndërkombëtare Rama përdori 76 mln euro si dhuratë për votuesit, fali 200 mln euro gjoba dhe kamata për të marrë votat.
Mobilizoi kartelet e drogës, më të rrezikshmit në Europë. Deputetët e karteleve zëvendësojnë ju në këtë Parlament, jo se ju nuk ishit mëkatarë, por vetëm njëri prej tyre, Arkendi që mori 2 mijë e 500 vota në 2021 mori nga Troplinët këtë vit 5 mijë vota më shumë se Rama.
Edhe kreu i grupit parlamentar të PS, Niko Peleshi ka mbajtur fjalën e tij në Parlament pas rikthimit pas rreth dy muajsh të punimeve. Mes thirrjeve të opozitës kundrejt mazhorancës, Peleshi u shpreh se “këtu jemi në parlament dhe jo në cirk.
Sakaq, ai theksoi se grupi i PS është dakord të rifillojnë punimet pas fushatës, dhe se deri në korrik do të ketë edhe 5 ose 6 seanca të tjera intensive.
“Jemi si grup parlamentar dakord që të rifillojmë punën pas një fushate të suksesshme për të gjithë, vendin dhe shqiptarët. Jemi në parlament jo në cirk këtu! Natyrisht që kemi plot arsye që të kërkojmë diskutime jashtë rendit të ditës sepse kemi shumë arsye. Do kemi disa seanca intensive deri në fillim të korrikut”, tha Peleshi.
E gjithë seanca ka zgjatur 15 minuta.
