Kreu i qeverisë, Edi Rama kërkoi sot nga banorët në Fushë- Torovicë në Lezhë, të votojnë Pjerin Ndreun për kryetar të bashkisë. Teksa inspektoi punimet e rrugës Balldre- Bend, Rama ka deklaruar se është fundi i shumëpritur i odisesë njëzetë e pesë vjeçare të një rruge të pakalueshme, gropash e gënjeshtrash të kujtdo u mori votat e pastaj u ktheu shpinën banorëve të Torovicës.
“Si jeni, afrohu se më keni lujt mendsh, rruga e Torovicës, po tashti, 20 vjet pa rrugë, tani ta bëjmë rrugën, këtu ishte për të kalu me tank, ta bëjmë tamam. Do ketë edhe Shëngjin Velipojën. Apo thuj, ti do na i bësh, ty do të mysin. Në fakt ashtu është se kush punon kritikohet”- tha Rama, teksa bënte batuta me banorët.
Më pas, lulet që ishin gati për të, Rama ia dhuroi njërit prej banorëve.
“Po lulet jepja atij, jepja. E di pse ti dhashë ty lulet, se ke votuar për LSI”- tha Rama.
Më tej, theksoi: Ishalla nuk ua zenë rrugën por për të përfunduar do përfundojë, unë nuk i lë rrugët në mes të rrugës. Zgjidhni Pjerinin kryetar bashkie se për kanalet vaditëse ne fondet ua japim bashkive dhe bëjmë edhe kanalet ne, për pjesën tjetër të mbështetjes ju japim mbështetje por bëni aplikime për projekte të përbashkëta”- tha Rama.
