Kryeministri Edi Rama do të jetë sërish në Theth këtë fundjavë. Vizita vjen fiks pas dy muajve nga vizita e fundit në këtë zonë turistike dhe ka një synim të mirëpërcaktuar.
Në takimin me banorët e Thethit 2 muaj më parë, shefi i qeverisë premtoi se deri me 30 qershor, do të jenë gati certifikatat e pronësisë së tokës, duke zgjidhur kështu një problem që bartet nga 1990.
Të shtunën pasdite, 29 qershor, Rama do të jetë në Theth ku do të kalojë edhe natën në një nga bujtinat e zonës. ShkodraWeb ka mësuar se janë marrë të gjitha masat e nevojshme për këtë udhëtim të kryeministrit.
Ndërkohë, ditën e dielë, pikërisht aty ku zhvilloi takimin me 30 prill, në sheshin e kishës, Rama do të ndajë edhe certifikatat e pronësisë së tokës për të vertetuar mbajtjen e premtimit të dhënë banorëve.
Ai ka premtuar po ashtu edhe zerimin e të gjitha gjobave për ndërtim pa leje në zonë, vlera e të cilave është mjaft e konsiderueshme, siç iu ankuan edhe banorët. Pritet nëse rama do të japë edhe këtë lajm të mirë për thethjanët.
