“Klasikja” futbollit shqiptar ngjyroset kuqeblu. Vllaznia ka mundur me përmbysje Tiranën në një ndeshje që nuk ka patur fare histori për bardheblutë.
Në fakt, goli i parë është i Tiranës, me autor Xhixhën në minutën e 25- të, duke krijuar idenë se miqtë mund të bënin edhe surprizën në Shkodër.
Gëzimi ka zgjatur vetëm 6 minuta. Për golin e barazimit ka menduar Bismark, i cili ka devijuar në portën e Tiranës topin e krosuar Mala në minutën e 31- të.
Me këtë rezultat ka përfunduar pjesa e parë, ndërsa e dyta ka nisur me autogol në portën e miqve. Balaj fut me forcë një top në zonën e bardhebluve dhe Cortez e devijon në portën e tij në minutën e 48- të.
Mala sërish në evidencë me një driblim fantastik si birila të disa futbollistëve të Tiranës dhe Halili nuk ka rrugë tjetër veç pengimit në zonë. Asnjë mëdyshje, Balaj godet saktë 11- metërshin në minutën 71 dhe 3-1.
Minutat e mbetura Vllaznia nuk ul ritmin, krijon raste dhe lojë por nuk ka gola të tjerë. “Klasikja” është e Vllaznisë e cila pret e qetë në krye të Supërligës ndeshjet e tjera.
