Boksieri Jurgen Uldedaj, i cili u shpall kampion bote në Londër në muajin tetor me titullin IBO, nga kjo e martë do te jete Qytetar Nderi i Lezhës. Titulli iu akordua nga Këshilli Bashkiak, me propozim të Bashkisë Lezhë, për kontributin e tij historik në sportin e boksit, ndersa vlerësimi për boksierin Uldedaj u bë përmes një ceremonie të veçantë, ku ishin të pranishëm drejtues të pushtetit vendor, përfaqësues të sportit dhe institucioneve, familjarë si dhe qytetarë të shumtë.
Boksieri Jurgen Uldedaj dhe xhaxhai i tij, Gjok Uldedaj, e konsideruan një nder të jashtëzakonshëm këtë vlerësim në qytetin e tij të lindjes.
Kryetari i Bashkisë Lezhë, Pjerin Ndreu, dhe përfaqësues të sportit vlerësuan arritjet e boksierit Jurgen Uldedaj, i cili numëron shumë tituj dhe medalje brenda dhe jashte vendit.
Jurgen Uldedaj e nisi rrugëtimin sportiv në boks që në moshë të vogël në qytetin e tij të lindjes, Lezhë, dhe brenda një kohe të shkurtër arriti majat botërore të këtij sporti, duke përfaqësuar Shqipërinë në arenat ndërkombëtare.
