VIDEO – Ka patur apo nuk ka patur Shkodra mbështetje nga qeveria Rama, as Xhaçka me Gjiknurin nuk bien dakort…

Të paktën prej 6 viteve, dilema “ka patur apo nuk ka patur Shkodra mbështetje nga qeveria Rama”, vazhdon të mbetet pezull. PD- ja, opozita por edhe Bashkia Shkodër kanë mbështetur idenë se nuk ka patur. Nga ana tjetër, vetë Rama, ish- ministra e ministra të tij, këmbëngulin që Shkodra ka patur mbështetje. Edhe pse në fakt, edhe në fushatën e fundit, kryeministri pranoi se është në borxh me Shkodrën.

Sot ishte mundësia që kjo dilemë, të merrte një farë përgjigjeje gjatë prezantimit të kandidates socialiste për kryetare bashkie të Shkodrës, Majlinda Angoni. Ministrja Olta Xhaçka ka thënë se Shkodra ka patur mbështetje, por do ta kenë më të madhe me Majlinda Angonin kryetare. Në minutat që foli, Xhaçka nuk përmendi asnjë investim apo projekt për “t’ ia përplasur turinjve” rivalëve politikë që qeverisin Shkodrën prej 31 vitesh.


Ndërkohë, në fjalën e tij, Gjiknuri si ish- ministër dhe sekretar i përgjithshëm i PS- së, premtoi se Shkodra do të ketë mbështetje me Angonin kryetare bashkie. Në fakt, ai la të nënkuptohej se nuk ka patur, por do të ketë. As ai, nuk përmendi asnjë investim apo projekt për të bindur shkodranët të votojnë alternativën Angoni.

Gjithsesi, dilema “ka patur apo nuk ka patur Shkodra mbështetje nga qeveria Rama” mbeti edhe pas këtij eventi, ku mbase shkodranët pritën të dëgjojnë një program nga PS- ja se si do të transformojnë Shkodrën nëse do të votohen për qeverisjen e saj në nivel vendor.

Me gjasa, kjo dilemë mund të marrë një përgjigje në ditët në vijim, gjatë takimeve të kandidates Angoni me qytetarët. Por përgjigjen e vertetë, reale, të pakontestueshme, do ta japin shkodranët me votën e tyre me 6 mars 2022. “Ka patur apo nuk ka patur Shkodra mbështetje nga qeveria Rama”, duhet të presim edhe pak javë për të marrë përgjigjen… /ShkodraWeb/