Shoqata “Intelektualët e Rinj, Shpresë” kishte njoftuar në faqen e vet zyrtare në Facebook Forumin Publik mes qytetarëve dhe kandidatëve për Kryetar Bashkie, në kuadër të nismës POP – Perballja e Ofertave Politike.
Sipas njoftimit zyrtar, pritej që sot, duke nisur nga ora 16:00 tre kandidatët për Bashkinë e Shkodrës, të uleshin kerah njeri- tjetrit për t’ iu përgjigjur pyetjeve të ndryshme nga audienca.
Të ftuar kanë qenë qytetarët, organizatat e shoqërisë civile, përfaqësues të institucioneve dhe mediat të bëheshin pjesë këtij forumi diskutimi. Eventi, ishte njoftuar se do të transmetohej në platformën Zoom.
Sipas një video të shpërndarë në faqen zyrtare në Facebook të IRSH- së, Bardh Spahia ka qenë kandidati i vetëm që ka dalë para audiencës, ndërsa Angoni dhe Bushati, nuk kanë qenë të pranishëm. Sipas organizatorëve, për shkak të agjendës së takimeve në kuadër të fushatës elektorale.
Në fjalën e tij, ndër të tjera, kandidati i “Shtëpia e Lirisë” Spahia vlerësoi se data 6 mars është ditë historike për Shkodrën e mbarë Shqipërinë.
“Ky është moment historik. Kemi shumë punë për të bërë. Ftoj të gjithë qytetarët që të bashkohen me këtë ndryshim të madh që do nisë me Shkodrën, por do të përhapet në të gjithë Shqipërinë. Unë besoj se edhe shëndetësia ka nevojë që të përmirësohet, mos të ketë më korrupsion e situata të jetë më e stabilizuar”, deklaroi Spahia.
Në këto ditë të fushatës elektlorale të 6 mars 2022, është hera e dytë që kandidatët tërhiqen nga debati publik me Bardh Spahinë. Më herët, në një debat përmes Skype në RTSH24, kandidati Bushati nuk u paraqit online, ndërsa Angoni u largua pas rreth 3 minutave me justifikimin se kishte agjendën e takimeve të ngjeshur.
