Sipas informacioneve të Zërit të Amerikës, autoritetet diplomatike të SHBA i kanë refuzuar vizën nënkryetarit të LSI Petrit Vasili. Ky detaj u bë publik mbrëmjen e sotme gjatë një interviste me kryetaren e LSI Monika Kryemadhi.
Gazetarja e VOA pyeti Kryemadhin lidhur me ndalimin e vizave për 170 zyrtarë në Shqipëri nëse ka politikanë në radhët e LSI të përfshirë në këtë listë, pyetje e cila u shmang nga kryetarja e LSI. Më pas gazetarja e pyeti Kryemadhin drejtpërdrejtë për Vasilin duke deklaruar se bazohej në burime pranë Zërit të Amerikës.
Kryemadhi deklaroi se Vasili është një njeri pa probleme megjithatë, nuk mund ta vërë dorën në zjarr as për fëmijët e as për bashkëshortin e saj.
“Nuk besoj se i është refuzuar viza. Nuk kam informacion. Në qoftë se ka një njeri pa probleme ai është zoti Vasili. Megjithatë unë nuk e vë dorën në zjarr as për fëmijët e mi e as bashkëshortin tim. Por zoti Vasili ka qenë një nga bashkëpunëtorët më të ngushtë të ambasadës amerikane për reformën në drejtësi”, u shpreh Kryemadhi.