Pas denoncimit në policinë e Shkodrës dhe të Malësisë së Madhe, ku thotë se nuk ka mbetur i kënaqur, Gjovalin Mikaj ka kërkuar edhe vëmendjen e mediave për largimin e bashkëshortes dhe djalit të tij të mitur nga banesa.
Prej dy ditësh, Mikaj, i cili është nga Malësia e Madhe, ka humbur kontaktet me bashkëshorten 31- vjeçare Klaudia Hiluku dhe djalin e tij të mitur vetëm rreth 2- vjeçar.
Ai shprehet se nuk ka më interes për bashkëshorten, por kërkon ti gjendet djali i tij. Sipas tij, bashkëshortja ka fikur celularët dhe është larguar pa lënë asnjë gjurmë. Ai shton se edhe më parë gruaja i është larguar nga banesa, duke ia lënë atij djalin ta mbajë.
Gjovalin Mikaj ka kontaktuar edhe me familjarët e bashkëshortes, të cilët, gjithmonë sipas deklaratave të tij, i kanë thënë se nuk duan të dinë më për vajzën e tyre dhe nuk kanë informacion.
Meqenëse në mes është edhe një fëmijë i mitur rreth 2- vjeçar, angazhimi i strukturave shtetërore, duhet të jetë në nivelet më të larta. Zgjidhja e problemeve të mundshme mes çiftit, mund të zgjidhet me rrugë gjyqësore por siguria e jetës së fëmijës, është çeshtje prioritare.
