Gjergj Rakaj, një personalitet i njojhur i fushës së financave dhe administrimit të tyre, është shpallur “Qytetar Nderi” i Bashkisë Malësi e Madhe. Ceremonia e rastit është zhvilluar në sallën e Këshillit Bashkiak Malësi e Madhe, me pjesëmarrjen e autoriteteve vendore, familjarëve, miqve dhe të njohurve të Gjergj Rakaj.
Teksa i ka dorëzuar titullin, kryetari i Bashkisë Malësi e Madhe, Toin Marinaj ka thënë se “Ndihem i privilegjuar që si Kryetar i Bashkisë Malësi e Madhe, t’i dorëzoja sot titullin “Qytetar Nderi” zotit Gjergj Rakaj. Një personalitet i shquar, profesionist i shkëlqyer dhe një Malësor i dalluar.”
Përgjatë jetës së tij profesionale, Gjergj Rakaj ka mbajtur shumë detyra të rëndësishme shtetërore, si Drejtor i Buxhetit të Shtetit, Zëvendësministër i Financave, Deputet i Kuvendit të Shqipërisë, Prefekt i Qarkut Lezhë, etj. Në secilën prej këtyre detyrave, ai ka treguar integritet, profesionalizëm dhe përkushtim ndaj njerëzve dhe atdheut.
Po ashtu, në Tiranë, ai ka qenë dhe mbetet një mbështetës i fuqishëm i malësorëve dhe një burim frymëzimi. Shembulli i tij është një pasuri e çmuar për të gjithë ne që ushtrojmë funksione publike dhe për brezat e ardhshëm, për t’i shërbyer me devotshmëri dhe përkushtim vendit tonë. “Figura të tilla i bëjnë nder Malësisë së Madhe.”, shkruan Marinaj në rrjetet e tij sociale.
