Bëhet me dije se është gjetur një makinë e djegur në fshatin Grudë e Re, rreth një orë pas ngjarjes në Dobraç. Brenda saj, janë gjetur dy kallashnikovë. Dyshohet se makina e gjetur, ka lidhje me ngjarjen.
Ndërkohë, burime nga Spitali Rajonal i Shkodrës konfirmojnë se në morg janë dy persona. Paraprakisht, i vrarë me armë zjarri është shtetasi Hamza Lici ndërsa e vdekur është edhe një grua, Flutura Basha, kalimtare e rastit.
Në gjendje të rëndë për jetën janë Arlind Bushati dhe një person tjetër, Bashkim Basha, burri i gruas së vdekur. Sipas informacioneve paraprake, burri dhe gruaja janë përplasur nga makina e përfshirë në ngjarjen e rëndë.
Shkodër/Informacion paraprak
Rreth orës 15:50, në aksin rrugor “Shkodër-Koplik”, në Dobraç, është qëlluar me armë zjarri në drejtim të një automjeti tip Benz, në lëvizje, me të cilin qarkullonin shtetasit H. L. dhe A. B.
Si pasojë e të shtënave ka humbur jetën shtetasi H. L., dhe është plagosur rëndë shtetasi A. B.
Automjeti që udhëtonin shtetasit H.L dhe A.B, ka humbur kontrollin dhe për pasojë ka përplasur një motoçikletë që udhëtonte shtetasi B.B dhe bashkëshortja e tij shtetasja F.B, ku si pasojë e përplasjes së automjetit me motomjetin ka ndërruar jetë shtetasja F.B dhe ndodhet në gjendje të rëndë në spital shtetasi B.B
Në vendngjarje kanë shkuar shërbime të shumta të Policisë dhe Forca Kombëtare e Sigurisë Njësia Shkodër, si dhe janë nisur në ndihmë 2 grupe të Repartit Special “RENEA”.
Është ngritur një grup i posaçëm hetimor dhe në drejtimin e Prokurorisë vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të rastit, identifikimin dhe kapjen e autorëve.
Po në ndihmë të grupit hetimor është nisur dhe Drejtori i Departamentit të Policisë Kriminale me një grup specialistësh të Drejtorisë për Hetimin e rimeve të Rënda
Ndërkohë, shërbimet e Policisë kanë rrethuar zonën dhe vijojnë kontrollet në terren dhe në ambiente të ndryshme, si dhe kanë ngritur pika kontrolli, për të bërë të mundur kapjen e autorëve.
