Shkodra është toka e talenteve, përgjithësisht kudo, por veçanërisht në sport. E kur flasim për sportin, kryefjala është padyshim futbolli. Vllaznia është një emër i madh, emblemë 106- vjeçare e sportit shqiptar. Përgjatë viteve, sidomos pas 1990- ës, janë të shumta ekipet që po sjellin në skenë emra të njohur. Ndër to, spikat “Djelmnia Shkodrane”, një klub futbolli që prodhon dhe furnizon me talente ekipe të njohura, nga Vllaznia e deri jashtë vendit.
Sot, do të flasim për Jurind Matoja, të cilin ua sugjerojmë specialistëve të futbollit ta mbajnë shënim. Para rreth 1 muaji, Jurindi festoi 12 vjetorin dhe në këto vite, 5 ja ka kushtuar futbollit. Dëshira për këtë sport, ka qenë e vetja, duke ndjekur sportin më të bukur në botë nga televizori por edhe duke e ushtruar në oborre e lagje me bashkëmoshatarët.
Sigurisht, mbështetja më e madhe në sport ashtu si në jetë, sot dhe në vijimësi, janë familja, nëna dhe babai. Jurindi thotë se zgjodhi “Djelminë Shkodrane”, duke nisur me trajnerin Kreshnik Krepi e sot, me Astrit Prençin. Në fakt, ka qenë ish- mbrojtësi kuqeblu Prençi që na sugjeroi të bëjmë një takim me Jurindin, për të njohur nga afër.
Jurindi flet pak, fiks si futbollistët, të cilët kanë dëshirë të “flasin” më shumë në fushën e blertë. Përkushtimi i tij është maksimal, 4 herë në javë stërvitje por edhe punë individuale për forcimin fizik. Është vetëm 12 vjeç por e ka të qartë se futbolli është e sotmja dhe do të jetë e ardhmja e tij, duke ëndërruar që të rreshtohet në elitë.
Ka preferuar të stërvitet qi qendrëmbrojtës, një pozicion shumë i rëndësishëm në një skuadër futbolli. Ka provuar të luajë edhe portier, por jo për një kohë të gjatë. Pavarësisht se mbrojtës, ai ka dëshirë të shënojë edhe gola, prandaj hoqi dorë nga porta. Ndërsa bashkëmoshatarët luajnë apo argëtohen në mënyre të ndryshme, Jurindi stërvitet dhe për të, është diçka krejt normale.
Jurindi që në këtë moshë, ka fituar trofetë e para, edhe si individ, por edhe si ekip, brenda por edhe në turne jashtë vendit. Nuk ka shumë dëshirë ti përmendë, sepse mbase pret trofe të rëndësishëm si modelt që ai ka zgjedhur të ndjekë, Bekim Balaj dhe Lionel Messi. Sipas Jurindit, Bekim Balaj si futbollisti më i mirë në Shqipëri dhe Messi si më i miri i botës.
Në fakt nuk ka si të ndodhë ndryshe, sepse Jurindi është një nga talentet e padiskutueshme që po formohet në Shkodër dhe shembulli i talenteve, janë më të mirët e Shqipërisë dhe të botës. ShkodraWeb i uron suksese Jurindit, për të cilin me shumë mundësi, do të dëgjojmë në vijimësi, si një emër i rëndësishëm në futbollin shqiptar. /ShkodraWeb/
