Kanë mbetur edhe 90 minuta deri në fund të Superliges. Teuta dhe Vllaznia ndajnë vendin e parë dhe të dytë vetëm pas golavarazhit. Durrësakët kanë një gol më shumë se Vllaznia. Pikët i kanë të barabarta. Në ndeshjen e fundit kuqeblutë presin në Shkodër ekipin e Laçit. Në Durrës Teuta e shkodranit Edi Martini pret Apoloninë të rrëzuar nga Superliga.
Në letër Teuta është më e favorizuar. Por kuqeblutë besojnë dhe duhet të besojnë deri në fund. Pas fitores fantastike me Partizanin në Tiranë, çdo gjë është e mundur në një sezon të çmendur, ku në pjeën më të madhe kryesoi Vllaznia dhe përsëri është në krye, me pikë të barabarta. Prandaj gëzimi pas fitores në Tiranë është i ligjshëm. Festojnë futbollistët e stafi në fushë dhe ata pak tifozë që u lejuan në tribunën e “Air Albania”.