Shkodra çel muajin maj me ngjyra, aromë dhe shumë gjallëri. Festa e Luleve, një nga aktivitetet më të dashura pranverore për qytetarët, nis më 1 maj dhe do të zgjasë për një javë të tërë, duke e kthyer qytetin në një skenë të hapur festive. Sara Smaja, Drejtore e Kulturës në Bashkinë Shkodër, tha se festivali do të hapet me një panair të luleve, një traditë të hershme shkodrane në kultivimin dhe kujdesin ndaj luleve.
Përveç panairit, në sheshin dhe pedonalen e qytetit do të zhvillohen aktivitete argëtuese dhe edukative për fëmijët, përfshirë punëtori artizanale dhe krijuese. Mbrëmjeve, atmosfera do të kulmojë me koncerte live në pedonalen e Shkodrës. Sara Smaja ftoi të gjithë qytetarët, jo vetëm nga Shkodra por edhe nga qytetet e tjera, të bëhen pjesë e këtij organizimi festiv. Shkodra këtë javë ofron shumë për të gjithë , kulturë, argëtim, kreativitet dhe atmosferë unike.
