16 minuta dhe 39 sekonda ka zgjatur prezantimi i kandidates së Partisë Socialiste për Bashkinë e Shkodrës Majlinda Angoni. Në sallën e kinema “Millennium” të qytetit të Shkodrës, janë tubuar anëtarë, mbështetës e simpatizantë të Partisë Socialiste por edhe të subjekteve të tjera të majta.
Takimi prezantues është hapur nga ish- ministrja Etilda Gjoni, është përshendetur nga ministrja Olta Xhaçka, sekretari i përgjithshëm i PS- së Damian Gjiknuri. Ky i fundit ka premtuar mbështetjen e qeverisë Rama për Shkodrën me kryetare Angonin ndërsa para tij, Xhaçka ka thënë se Shkodra ka patur mbështetje. Në të dy rastet, nuk është evidentuar asnjë projekt konkret kur Bashkia e Shkodrës është mbështetur.
Fjala e kandidates Angoni ka zgjatur 5 minuta dhe është ndërprerë disa herë nga duatrokitjet e të pranishmëve në sallë. Siç ishte e kuptueshme, Angoni ka shprehur rezerva për qeverisjen e këtyre 31 viteve të Bashkisë së Shkodrës nga Partia Demokratike, duke thënë se shkodranët nuk kanë kohë për të humbur.
“Brenda 300 ditëve të para të qeverisjes së Shkodrës, do të punoj për një qytet më të pastër dhe me më shumë energji”, ka qenë premtimi i i kandidates Angoni, duke thënë se shkodranët nuk kanë nevojë të presin një mandat të ri apo tri dekada të reja. Në fjalimin e saj të shkurtër, Angoni nuk ka prezantuar asnjë prioritet të punës së saj, projekt konkret që do të realizohet me ardhjen e saj në krye të bashkisë. Mbase, do të shpalosen të takimet në vijim dhe jo në ditën e prezantimit zyrtar para strukturave, edhe pse logjikisht, mund të kishte një program me disa pika për të bindur shkodranët të votojnë PS- në pas 31 viteve.
Në ceremoninë e prezantimit të kandidates socialiste për Bashkinë e Shkodrës, ka munguar kryeministri dhe kryetari i PSSH- së Edi Rama. Nuk dihen arsyet e kësaj mungese, por mungesa e tij mund të lexohet edhe si vijimësi e qasjes së tij dhe të qeverisë që kryeson ndaj Shkodrës dhe shkodranëve.
Pas fjalës së sekretarit të përgjithshëm Damian Gjiknuri, takimi ka përfunduar duke mos i lënë hapësirë asnjë përfaqësuesi politik të Shkodrës, qoftë deputet apo partiak, madje as drejtueses politike të Qarkut të Shkodrës për PS- në, Edona Bilali, e cila kishte në krah aktoren e mirënjohur të humorit Zyliha Miloti. Eventi është transmetuar “live” në faqen në Facebook të Damian Gjiknurit. /ShkodraWeb/
