VIDEO – Dalin pamjet, momenti kur çifti i grabitësve të argjendarisë në Shkodër përleshet me pronarët…

Tre ditë më parë një çift të rinjsh nga Vlora, kanë tentuar të grabisin ditën për diell, në mes të Shkodrës një argjendari. Arben dhe Anisa Hoxhaj, bashkëshortë, janë paraqitur si çdo klient tjetër tek argjendaria.

Kanë parë artikujt dhe i kanë kërkuar pronarëve të argjendarisë, një burrë dhe një grua, të shohin disa bizhuteri nga afër. Natyrisht, pronarët ia kanë vënë mbi vitrinë dhe vlonjatët kanë nisur ti shohin.


Në një moment, kur çifti Hoxhaj ka menduar se pronarët kanë humbur disi perqendrimin, gruaja Anisa, ka nxjerrë me shpejtësi një spray, sipas gjasave me spec djegës, dhe ua ka hedhur në fytyrë burrit dhe gruas përtej banakut.

Me bizhuteritë në dorë, ata kanë tentuar të dalin nga argjendaria, por pas tyre u janë vënë pronarët. E gjithë kjo skenë është filmuar nga kamerat e sigurisë, ku shihet edhe përplasja fizike e pronarëve me dy grabitësit nga Vlora.

Ndërkohë, mësohet se kalimtarë të rastit por edhe pronarë të bisneseve afër argjendarisë, kanë ndërhyrë duke neutralizuar grabitësit. Nuk ka vonuar dhe në vendngjarje ka ardhur edhe policia, e cila ka bërë ndalimin e Arben dhe Anisa Hoxhaj.

Ditën e sotme, çifti i grabitësve ka dalë para gjykatës së Shkodrës, e cila ka caktuar masën e sigurisë arrest me burg për të dy të rinjtë nga Vlora që tentuan grabitje si “Boni&Klajd”. /ShkodraWeb/