Sali Berisha do të jetë kryetar i Partisë Demokratike edhe pak ditë, maksimumi disa javë, deri në shpalljen e rezultatit të zgjedhjeve të përgjitshme për Kuvendin, të zhvilluara me 11 maj 2025. Kjo nuk është zgjedhje në dorën e Sali Berishës, por është përcaktuar qartësisht, e zeza në të bardhë, në Statutin e Partisë Demokratike, miratuar me 11 dhjetor 2021 në stadiumin “Arena Kombëtare” në mënyrë plebishitare, në kohën e Foltores.
Neni 47, “Kryetari i Partisë”, miratuar për shkak të precedentit “Basha” që nuk largohej edhe pas humbjeve të zgjedhjeve të përgjithshme për Kuvendin, sanksionon qartë në pikën 8 të tij: “Në rast se pas shpalljes së rezultatit të zgjedhjeve të përgjithëshme për Kuvendin, Partia nuk rezulton forcë fituese qeverisëse, mandati përfundon menjëherë dhe automatikisht për shkak të Statutit. Në këtë rast, kryetarit që i përfundon mandati, nuk i lejohet kandidimi në zgjedhjet pasardhëse për kryetar partie.”.
Madje, në një nga takimet në kuadër të Foltores, me 27 mars 2022, Berisha e përsëriti para mbështetësve të tij këtë nen të veçantë të përfshirë në Stautin e PD- së, siç mund ta shikoni edhe në videon më poshtë.
Por a do ta zbatojë Statutin e PD- së Berisha? Në videon më sipër, mund të shikoni edhe përgjigjen e dhënë nga kryedemokrati, ku lë të kuptohet qartë se trë paktën tani për tani, deri sa “të sigurojë votën e lirë për shqiptarët”, nuk do të dorëhiqet nga posti i tij politik. Përtej kësaj, pritet të shpallet zyrtarisht nga KQZ vendimi për zgjedhjet e 11 majit 2025 për të parë reagimin e Berishës, përtej deklaratës së ditës së sotme.
Nëse Berisha nuk vepron duke dhënë dorëheqjen, është detyrë e organeve të tjera të zbatojnë Statutin, duke nisur procedurat për zgjedhjen e kryetarit të ri, ku po sipas Statutit të PD- së, Berishës nuk i lejohet të kandidojë. Nuk kanë mbetur edhe shumë ditë, maksimumi javë për të konstatuar nëse Berisha do ta respektojë nenin, për futjen e të cilit në Statutin e PD- së, ka qenë ndër mbështetësit kryesorë publikë. Dhe neni që cituam më sipër, flet vetëm për shpallje të rezultatit të zgjedhjeve të përgjithshme, që normalisht bëhet nga KQZ. Nuk flitet askund për njohje apo mosnjohje të zgjedhjeve nga PD.
