Ditën e sotme në Shkodër është përkujtuar 28 Nëntori, Dita Kombëtare e Shqipërisë. Para sheshit të Bashkisë, u tubuan personalitetet civile dhe fetare të Shkodrës, në respekt të masave të vendosura nga autoritetet për shkak të pandemisë.
Nën tingujt e Himnit Kombëtar, u bë ngritja cerenmoniale e Flamurit Kombëtar nga përfaqësues të Forcave të Armatosura. Fjalën e rastit, e ka mbajtur kryetarja e Bashkisë së Shkodrës Voltana Ademi.
Mjaft e veçantë ishte ndërhyrja e Haxhi Fejzi Zaganjori, i cili bashkë me përfaqësues të komuniteteve të tjera fetare, thanë edhe një lutje në këtë ditë të veçantë për të gjithë shqiptarët.
Një fjalë përshendetëse mbajti edhe Prefektja e Qarkut Shkodër Majlinda Angoni. Festa e 28 Nëntorit në Shkodër, ka bashkuar kështu të gjithë faktorët, duke dhënë shembull të fortë uniteti në mes shqiptarëve. /ShkodraWeb Media/
