Ish-kryeministri Sali Berisha ka deklaruar për mediat pas mbledhjes së Komisionit të Rithemelimit të Partisë Demokratike se figurat e njohura politike të cilat janë larguar në 8 vitet e fundit nga selia blu janë të mirëpritur të rikthehen në parti.
Berisha bëri të ditur se mund të rikthehet Jozefina Topalli, Arben Imami, Astrit Patozi, Rudina Hajdari dhe Majlinda Bregu. Gjatë fjalës së tij Berisha zbuloi se Kuvendit Kombëtar të PD-së do t’i propozohet ose data 21, ose data 22 maj për zgjedhjen e kryetarit.
“U ra dakord që t’i propozohet Kuvendit data për zgjedhjen e Kuvendit. Data që do t’i propozohet Kuvendit dhe do të jetë ose data 21 ose data 22 e majit, varet si i bie, e shtunë ose e diel. Gara është hapur dhe do përcaktohen rregullat nga komisioni. Sapo të vendos Kuvendi, unë pothuajse e kam shpallur kandidaturën dhe Kuvendi do të vendosë datën”, tha Berisha.
Gjithashtu Berisha shtoi se është drejt përfundimit dhe procesi i zgjedhjes së kryetarëve të degëve të zhvilluara nga Komisioni i Rithemelimit. Ish-kryeministri vlerësoi procesin deri në këto momente, ku theksoi se kanë marrë pjesë mbi 40 mijë anëtarë.
“Ishte një proces shumë i mirë me pjesëmarrjen e mbi 40 mijë anëtarëve. Komisioni do të jetë nësër përpara jush për t’iu informuar mbi procesin dhe t’iu përgjigjet pyetjeve tuaja”, tha Berisha.
Pjesë nga prononcimi për mediat:
Sa i takon Këshillit Kombëtar a do të ketë një prezantim të listës që do t’i dërgohet Kuvendit?
Berisha: Patjetër!
Në këtë listë a ka emra që rikthehen në Partinë Demokratike, figura të rëndësishmë të saj që gjatë 8 viteve të fundit janë larguar?
Berisha: Ka emra të tillë, në këtë listë për shembull është Arben Imami, Jozefina Topalli kthehet jo vetëm me listë por si të dëshirojë, ex officio.
Po zonja Bregu dhe z. Patozi?
Berisha:Zonja Bregu është në një funksion….
A do të ketë një ftesë?
Berisha: Sigurisht që do të ketë.
Po për z. Patozi?
Berisha:Patjetër që është i hapur, edhe z. Patozi, edhe Rudina Hajdari, e cila u largua dhe u kthye. Të gjithë ata që për një motiv apo për një tjetër janë larguar janë të mirëpritur.