Aksioni për lirimin e hapësirave publike të zëna në mënyrë të kundërligjshme po vijon në të gjithë qytetin e Shkodrës, si pjesë e angazhimit për të rikthyer këto hapësira në funksion të komunitetit dhe për të garantuar respektimin e ligjit.
Në këtë proces nuk ka vend për interpretime apo pretendime të pabazuara. Çdo ndërhyrje mbështetet në dokumentacion zyrtar të Agjencisë Shtetërore të Kadastrës, hartat e regjistrimit të pasurive dhe verifikimet e kryera në terren nga strukturat përkatëse.
Në rastin konkret, dokumentacioni provon qartë se hapësira publike është zënë në mënyrë të kundërligjshme, duke u ngushtuar nga rreth 7.95 metra në vetëm 6.10–6.15 metra. Sipas projektit të miratuar dhe të dhënave teknike, kjo hapësirë është e përcaktuar si trotuar, pjesë e pandashme e funksionit publik dhe në shërbim të qytetarëve.
Këtë e konfirmojnë edhe pamjet në terren: pas prishjes së strukturës së vendosur, është bërë e dukshme se edhe ndërtimi i realizuar së fundmi e kishte të parashikuar trotuarin, i cili tashmë ka dalë në sipërfaqe, duke vërtetuar qartë natyrën publike të kësaj hapësire.
Pavarësisht këtyre fakteve, janë bërë përpjekje për ta paraqitur këtë hapësirë si pronë private, në kundërshtim të plotë me dokumentacionin zyrtar. Subjekti qiramarrës është vënë në dijeni dhe është sqaruar në mënyrë formale mbi të dhënat përkatëse dhe detyrimet që rrjedhin nga legjislacioni në fuqi.
Në këtë proces nuk ka rëndësi emri i përveçëm, pozicioni publik apo përkatësia politike që mund të ketë një individ apo subjekt. Ligji dhe rregulli janë njësoj për të gjithë dhe do të zbatohen pa asnjë përjashtim.
Bashkia Shkodër do t’i qëndrojë fort zbatimit të ligjit dhe lirimit të çdo hapësire publike të zënë padrejtësisht. Nuk bëjmë show me të drejtën, por kryejmë detyrën që qytetarët na kanë besuar. /Deklaratë për mediat e Bashkisë Shkodër/
