VIDEO/ Basha mbledh Grupin Parlamentar: Opozite e forte, asnjehere bashkeqeverisje me PS!

Në mbledhjen e fundit të grupit para konstituimit të Kuvendit nesër në orën 10:00, kryetari i PD, Lulzim Basha në fjalën e mbajtur para grupit parlamentar, deklaroi se Partia Demokratike në asnjë rast dhe asnjë rrethanë nuk do të përfshihet në qeverisje. Pasi u është përgjigjur kritikëve brenda së djathtës se nuk do të ketë asnjë përfshirje të PD në qeverisje me Ramën, Basha deklaroi se objektiv është opozita e forta e mbështetur në tre pika.

Ai tha se duhet të bëhemi pengesë për të mos lejuar që vendi të rrëshqasë në kaos nga droga dhe krimi.

“Një mesazh të shkurtër. Dua ta filloj më një mesazh të qartë, ne jemi opozita dhe të bëjmë opozitën deri kur shqiptarët të na besojnë me votë. Nuk do të ketë asnjë ndarje pushteti dhe asnjë lloj përfshirje të PD në qeverisje në asnjë rast dhe asnjë rrethanë.

Një opozitë e fortë është domosdoshmëri për Shqipërinë. Kjo është një kohë kritike për Shqipërinë, ku do të përcaktohet nëse vendi do i rikthehet integrimit dhe demokracisë apo do të zhytet në sundimin e krimit me elitën e korruptuar.

Kemi tre sfida; në takon ne të bëhemi pengesë që vendi të mos rrëshqasë në kaos, droga, krimi dhe korrupsioni po e vdesin cdo mundësi për zhvillim në Shqipëri dhe po izolojë vendin. Na takon ne ta ndryshojmë politikën dhe të ofrojmë alternativën” deklaroi ai.

E ndërsa theksoi se objektiv do të jetë reformimi i PD, Basha deklaroi se do të ketë protesta kundër keqqeverisjes së vendit.

“Do të reformojmë PD, e cila do i paraprijë reformimit të vendit, duke filluar nga Kodi Zgjedhor. Do të jemi shembulli i ndershmërinë dhe përgjegjshmërinë ndaj njerëzve.

Do të propozojmë zgjidhjet tona politike dhe ligjore, do të sqarojmë njerëzit mbi problemet, do të protestojmë kundër keqqeverisjes dhe drogës. Do të jemi alternativa e njerëzve.

Shqiptarët janë më të braktisur se kurrë nga politika dhe elita e korruptuar, duhet të ngjallim shpresën.

Opozita jonë nuk do të jetë e lehtë. Deputetëve të rinj iu uroj një fillim të mbarë, mirë se vini në botën e ashpër të politikës shqiptare; do iu fyejnë, por ju ruani dinjitetin, puna do u shpërblehet me mirënjohjen e njerëzve” përfundoi Basha në mbledhjen e grupit të PD.

Këtë mandat të Kuvendit, kryetari i PD, Lulzim Basha do të jetë në Kuvend. Ndërsa aksioni nis nga kundërshtimi i dy emrave, Rucit dhe Xhafajt, pasi PD i akuzon për të kaluarën komuniste dhe lidhje me krimin.

Rama sot u bëri thirrje demokratëve që të votojnë Ruçin në postin e kryetarit të Kuvendit, por opozitarët po përgatiten për protesta.

Grupi i PD ka 43 deputetë, 20 deputetë janë të rinj, ndërsa qarqet e Korçës dhe të Shkodrës kanë më shumë emra të rinj. Ne fund, Edmond Spaho eshte zgjedhur kryetar i GP te PD ndersa Edi Paloka nenkryetar i tij. /shqiptarja.com/