Protestë në rrugën e Komanit në Qarkun e Shkodrës. Banorët shprehen se do të bllokojnë rrugën në rast se nuk do të rikonstruktohet. Ministrja e Infrastrukturës Belinda Balluku tha se ky aks rrugor nuk është prioritet për momentin për shkak të krizës energjitike duke anuluar projektin që ishte për rikonstruksionin e këtij aksi.
Banorët dhe pronarët e subjekteve shprehen kundër ministres dhe tregojnë se nga nesër e mbrapa, aksi i Komanit ku ndodhet edhe hidrocentrali do të bllokohet nga ana e tyre. Banorët e quajnë si aksi i vdekjes ndaj është e pafalshme sipas tyre anulimi i projektit dhe kërkojnë rikonstruksionin e këtij aksi.
Ky projekt u prezantua pak para zgjedhjeve të 25 prill 2021, si një investim i KESH në kuadër të përgjegjësisë sociale për banorët e territoreve ku shtrihen hidrocentralet. Jo vetëm kaq, përveç prezantimit, procedura eci edhe më tej.
U hap tenderi për të shpallur firmën kontraktore, ndërsa disa ditë më parë Ministrja Balluku njoftoi se nuk do të realizohet ky projekt në vitin 2022, duke mos u parashikuar në buxhet, madje as në buxhetin afatmesëm. Deputeti i Shkodrës Benet Beci, asokohe drejtor i përgjithshëm i KESH, ka njoftuar se do të bëjë të gjitha përpjekjet që projekti me impakt jo vetëm në turizën për Qarkun e Shkodrës, të realizohet sa më shpejt.
