Këshilltari i bashkiak i Shkodrës Arbis Vjerdhja, e konsideron të qëllimshëm zjarrin e rënë në tre lokale në qendër të qytetit më të madh verior, ku njëri prej tyre ishte pikërisht i tij. Në një dalje para mediave, Vjerdha e ka konsideruar të qëllimshëm zjarrin, duke shtuar si fillimisht është dëgjuar nga banorët një shpërthim.
Në përgjigje të pyetjeve të gazetarëve, ai ka lënë të kuptohet se zjarri lidhet me pozicionimet e tij si këshilltar bashkiak. Vjerdha ka rikthyer në vëmendje edhe një kërcënim që ka marrë me telefon nga deputeti Ilir Beqaj, por ka shtuar se nuk beson se pas këtij akti është ai.
Këshilltari bashkiak ka shprehur pakënaqësi edhe për punën e prokurorisë dhe policisë për zbardhjen e ngjarjes, teksa ka thënë se në katin e parë, në asnjerin nga lokalet që u përfshinë nga flakët, nuk ka patur bombula gazi. Arbis Vjerdha ka thënë se kërkon zbardhjen e plotë të ngjarjes, teksa ka paralajmëruar se vetëm vdekja mund ta ndalë nga pozicionimet e tij. /ShkodraWeb Media/
