Një aksident ka ndodhur para pak minutave në Shkodër, në afrësi të pallatit të “Perdejve” siç njihet në qytet, pranë Radio Shkodrës. Në rrethana që duhen sqaruar nga specialistët, një mjet në lëvizje është përplasur me një person me biçikletë.
Sipas informacioneve jo zyrtare nga vendngjarja, burri me biçikletë, rreth 60 vjeç, ka tentuar të kalojë nga korsia e biçikletave, përmes vijave të bardha, në anën tjetër të rrugës.
Ndërkohë, drejtuesi i mjetit thotë se burri me biçikletë, i doli papritur përpara dhe është përplasur pasi ai ka hapur derën e mjetit. Gjithsesi, policia është në vendngjarje dhe po punon për zbardhjen e rrethanave.
Ndërkohë, burri i aksidentuar, është dërguar me autoambulancë në urgjencën e Spitalit të Shkodrës, teksa nuk ka informacion zyrtar mbi gjendjen e tij shëndetësore.
