Një aksident i rëndë ka ndodhur në aksin Lezhë – Shkodër, në afërsi të kryqëzimit në fshatin Piraj. Një automjet është përplasur me një trailer me targa Serbie dhe për pasojë ka dale nga rruga duke përfunduar në kanalin anës rrugës.
Një person ka humbur jetën dhe 4 të tjerë janë plagosur. Janë banorët e zonës dhe policia, të cilët kanë bëre të mundur të nxjerrin të plagosurit nga kanali dhe janë dërguar me urgjencë në spital. Mes tyre, edhe një i mitur.
Lezhë / Informacion paraprak
Rreth orës 22:00, në aksin rrugor Shkodër–Lezhë, në afërsi të fshatit Dajç, ka ndodhur një aksident rrugor, ku janë përfshirë një automjet dhe një mjet trajler.
Si pasojë e aksidentit ka humbur jetën në vendngjarje shtetasja R. Ç, rreth 56 vjeçe.
Nga aksidenti kanë mbetur të dëmtuar shtetasja A. Ç., 35 vjeçe, dhe fëmija i saj i mitur 3 vjeç, shtetasi L. Ç, rreth 60 vjeç si dhe drejtuesi i automjetit, shtetasi K. S, të cilët janë transportuar në Spitalin e Traumës për ndihmë mjekësore më të specializuar.
Drejtuesi i trajlerit, shtetasi S. I, banues në Serbi, është shoqëruar në Komisariat për veprime të mëtejshme procedurale.
Grupi hetimor ndodhet në vendngjarje dhe po punon për zbardhjen dhe dokumentimin e plotë të rrethanave dhe shkakut të aksidentit.
Lezhë / Informacion shtesë
Në vijim të informacionit paraprak të dhënë më datë 23.07.2025, në lidhje me aksidentin rrugor të ndodhur rreth orës 22:00, në aksin rrugor Shkodër–Lezhë, në afërsi të fshatit Dajç, ju informojmë se:
Si pasojë e plagëve të marra nga aksidenti, ka ndërruar jetë në Spitalin e Traumës edhe shtetasi L. Ç.
Grupi hetimor vijon punën për zbardhjen dhe dokumentimin e plotë të shkaqeve dhe rrethanave të aksidentit.
