Detaje të reja janë zbardhur nga ekzekutimi i 30-vjeçarit Can Karriçi mbrëmjen e sotme në Kodër Kamëz. I riu nuk është një emër i panjohur për drejtësinë.
Raportohet se 30-vjeçari është arrestuar më parë për plagosje me dashje në Tiranë dhe armëmbajtje pa leje. Ai është arrestuar në shkurt të këtij viti në një objekt në afërsi të Milotit, ku nga kontrollet e policisë, në këtë ambient është gjetur dhe sekuestruar një pistoletë tip “Glock”, fishekë dhe targa të vjedhura.
Gjithashtu mësohet se Can Karriçi është mik i Erigers Mihasit. Ky i fundit u ekzekutua vetëm një muaj më parë në një atentat në zonën e Astirit. Deri më tani, nuk dihet ende nëse të dy ekzekutimet kanë lidhje me njëri-tjetrin teksa policia po vijon hetimet.
30-vjeçari Can Karriçi është gjetur nga kalimtarët e rastit brenda makinës së tij.Në momentin e parë, ai është gjetur i plagosur me armë zjarri dhe i mbuluar me gjak.
Pavarësisht se u dërgua në spital, gjatë rrugës ai ka ndërruar jetë. Sipas policisë, ngjarja ka ndodhur në rrugën “Nikoll Vatnikaj” në zonën e Kodër Kamzës rreth orës 19:56.
