150 mijë euro është dëmi i shkaktuar nga zjarri i rënë në një restorant në zonën turistike të Thethit mesnatën e kaluar. Shifra bëhet publike nga pronarja, Aida Gjeçaj. Ajo thotë se ka qenë në Tiranë për arsye administrative të biznesit dhe rreth orës 2 të mëngjesit, është njoftuar për zjarrin e rënë.
Sipas saj, kanë qenë banorët ata që kanë ndihmuar shuarjen e flakëve, duke penguar përhapjen e tyre në strukturat e tjera rrotull. Gjeçaj thotë se ka 10 vite me këtë bisnes, ndërsa vitin e kaluar investoi 150 mijë euro në strukturën e saj. Ajo shton se fatmirësisht nuk ka dëme në njerëz, banorë apo turistë.
Gjeçaj përjashton rënien e zjarrit për shkak të energjisë elektrike, teksa flet për koençidencën fatkeqe mes aksionit të IKMT- së dhe zjarrit të rënë në strukturën e saj. Ajo nënvizon se ka vetëm 5 dhoma, teksa thotë se çdo gjë është bërë me leje dhe konform rregullave, madje edhe me funksion “green”, me panele diellore.
Pronarja e Vila “Gjeçaj” thotë se ka besim se drejtësia do të zbardhë dinamikën e ngjarjes, teksa vijon se nuk ka asnjë dyshim për shkakun e zjarrit, pasi nuk ka patur asnjë problem me askënd në zonën e Thethit e më gjërë.
